島上遇到貓 ~ 睦月島 (muzukijima)

根據wiki所講, 位於日本四國愛媛縣松山市近嘅忽那諸島, 總共有7個島, 分別為中島, 津和地島, 怒和島, 二神島, 睦月島, 野忽那島同由利島. 當中由利島係無人住. 雖然行程中有幾日落大雨, 但都叫走馬看貓, 先後登上全部有人住既6個島.

我係晨早坐第一班船去睦月島, 去到時, 咁岩就見到島上既公公婆婆一齊出市集買餸. 有講有笑, 朝氣勃勃. 附近就有十幾隻貓响樹等食早餐. 有婆婆問我响邊度黎, 我答佢我係由香港黎, 婆婆嘖嘖稱奇. 之後全個島都知我响香港黎, 比fb status仲要快 XD 不過, 我諗第二日, 全個島都會知我果朝掛住影相, 唔記得落船. 好在船長肯再次泊岸比我落船. 而我坐果班係Ferry, 要响船頭放低塊行車板, 係好麻煩幾位船員.

路上遇到一屋幾乎全部都係三色貓

睦月島風景

村落

楓樹

紫藤

公公婆婆扶手載貨兩用嘅車仔

愛媛縣盛產蜜柑, 島上有好多蜜柑園. 見到園內用黎運貨既單軌小火車

日本好多類似嘅小島, 都要面對人口老化, 年輕人都去城市工作同居住既問題. 見到呢間理髮店貼出黎告示, 上面寫住因為人口減少, 每周只會營業4天. 若然再進一步減少既話, 仲只係開3日.

漁港係大家嘅, 大家都係珍而重之

睦月島碼頭有單車可以租. 有機會再去我都會租, 事關睦月島都幾大

碼頭嘅待合室

睦月島好多貓, 島民亦非常親切, 最緊要係一句廣東話都聽唔到! 有機會我都想再去一次, 行埋未行(或踩單車)既部份.

最後順帶一提, 睦月島上只見有小商店售賣小食, 所以最好上船前準備乾糧.

交通資訊

去忽那諸島, 我全部都係由高浜港出發, 坐高速船或可載車嘅Ferry. 因我住松山, 我就搭伊予鉄道高浜線, 坐到去總站高浜駅. 一出高浜駅行過對面馬路, 就係碼頭.

高浜駅

高浜駅對面過一條馬路就係碼頭

去睦月島就要坐中島汽船嘅東線. 船有分高速船同可載車既Ferry. 快船同慢船唔係差太遠, 但價錢就差好多. 大家可以去中島汽船嘅睇官網資料, 然後自己衡量一下:

船期表:

http://www.nakajimakisen.co.jp/contents/time-table.html

船費表:

http://www.nakajimakisen.co.jp/contents/price.html

因為要就行程, 我就揀左坐Ferry

船入面既裝潢感覺幾豪華

上到船入面, 可以拎到既証明書, 應該係比上班族claim錢用

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次.  夏季同冬季亦可以分有兩組唔同嘅班次. 一個唔留神, 好容易就會睇錯隔離班次.  另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

4,104 total views, 5 views today

您可能也會喜歡…

發表迴響

你的電子郵件位址並不會被公開。

Bitnami