島上遇到貓 ~ 青島 (aoshima)

去青島每 日只得兩班船, 上畫8am一班, 下畫230pm一班. 碼頭位置伊予長浜駅. 最早一班車由高松駅開出既火車係604am! 去到伊予長浜駅大717am. (自己揸車嘅話, 時間會快少少, 同唔使咁早去到碼頭). 前一晚本來諗住買定野食, 因為見高松駅有間7仔. 點知晨早天未光去到, 見到間7仔未開, 附近又唔見並他便店, 嚇死! 原來間7仔開545am! (後來見到伊鐵大手町駅附近有另一間7仔, 果間近民居, 應該開24hr) 所以大家如果諗住坐604am呢班車, 最保險都係前一晚買定野食. 事關伊予長浜駅果邊都唔見有便利店. (可能再行過少少個鎮有, 但我無行到過去). 另外青島上面都係乜都無, 除非你想食貓糧.

晨早起身去搭604am嘅JR

535am! 唔係為左影貓, 我係唔會咁早起到身. 另外有趣嘅地方係, 駅字係用驛

松山駅閘口

落車時先至發現, 原來呢一段路線仲未電氣化!

 

伊予長浜駅外觀

果朝除左我, 仲有另外兩位香港人, 同幾位日本人响度等船. 點知8點前, 船長同船員都分別用望遠鏡望出海, 最後就宣佈大浪停航. 日本既天氣予報都可謂超級準, 話好天就係好天, 話落雨就係落雨. 我前一晚見話好天, 已安心左一半. 果邊嘅天氣報告, 仲會報導多一樣野, 就係浪有幾高, 暫時我未响日本其他地方既天氣報告見過, 睇黎呢樣資訊對於佢地黎講係好重要. (瀨戶內海, 內海內海, 我有錯覺以為會係風平浪靜, 點知我係錯嘅. google map睇同落到地面睇又係兩回事, 瀨戶內海比我想像中大好多好多). 網上睇話只要唔過0.5m就通常都OK. 但海浪高度予報只分三區: 松山, 新居浜同宇和島, 其實範圍甚廣. 青島果邊嘅海域, 只係一個小點, 所以都只可以作為參考. 所以當時都有位日本女士走去同船長理論一陣, 話咁好天都唔開船有冇攪錯之類. 日本女士見到我地幾個, 就問我地响邊度黎, 我答香港, 佢立即表示驚訝. 但我話都係無辦法啦…日本人多數都係自己揸車去. 碼頭附近可以泊車. 我去嘅時候仲係任泊, 不過E家要收錢了.

朝早去到碼頭時係水漲

令人崩潰嘅欠航告示牌

終於到下畫點幾鐘, 去到碼頭, 見水退左好多 (我心諗下次如果真係再去, 使唔使check埋潮汐既漲退?!) 船長話可以開船! 果時我有諗如果回程時又大浪咁會點算? 下畫時再遇到另外兩位香港人. 朝早見到既日本人, 好似下畫都無再黎.下畫見到既日本人, 似乎都係自己揸車黎. 船程約35分鐘, 望番轉去碼頭, 先見到原來四國中間嘅山脈都幾高. 大約3pm去到青島, 好多貓聽到船聲都開始行出黎接船. 歡樂既時光過得特別快, 415pm就要講拜拜. 如果你係好似我咁想影相既話, 就絕對係唔足夠的! 不過如果坐8am船, 你就要有心理準備响個島度hea8粒鐘, 同每隻貓影學下相咁.

下晝再去到碼頭時見到已水退

船上回望碼頭

四國中間嘅山脈, 睇黎都唔矮

前面就係青島

我去忽那諸島果邊坐嘅高速船, 其實都係大隻過去青島少少, 海浪係頂到嘅. 再睇埋個schedule, 就似係特登set成咁已確認你上島嘅意志. 8am嗰班要你晨咁早起身, 同415pm先比你走. 230pm果班, 就叫早比你上去一個鐘感受下, 時間唔短唔長, 唔會太騷擾到島民嘅生活. 同田代島一樣, 青島都係無啦啦出左名, 似乎都係拜傳統傅媒做嘅好事. 見到青島碼頭附近好多圍欄同告示, 感覺唔係太舒服. 成個旅程唔少日本人問我黎四國有乜野做, 我答影貓, 幾乎全部都話叫我去青島! 只有兩個同我講睦月島都係貓島. (當然, 其實好多島都有貓) 十幾廿隻貓一齊湧出黎既澎湃畫面, 我响其他島都見到, 不過青島係有幾群十幾廿隻. 我個比較傾向順應大自然既規律, 點解其他島唔見有咁大量既貓, 似乎係有太多人類嘅界入所致. 係好事定係壞事, 或者我留比大家自己去感受.

碼頭附近係唔可以餵貓, 要去左邊嘅一處空地度餵

牧貓嘅概念

牧貓嘅概念

星光大道

見到兩個鳥居, 影到差唔多同一樣嘅貓相

 

準備離開上船之前, 感謝黃貓, 影到呢張我好鍾意嘅一張相

你問我想唔想再去多次, 我係想既, 坐8am船先可以慢慢影. 但瀨戶內海好多仲有好多其他貓島, 島民日漸年老, 年輕人又唔會去D島度住, 航班只會越來越少, 真係唔知再過多幾年, 會唔會有D島會再去唔到?

寧謐嘅小漁港

 

交通資料

呢個旅程, 除左去青島, 我仲去埋忽那諸島, 所以我選擇住响松山.

朝早嘅松山駅

日落黃昏嘅松山駅

因為買左JR pass, 就無租到車, 其實係有D後悔. 由松山坐JR去伊予長浜駅, 大約一個鐘頭多D.

遠眺青島

遠眺青島

到左伊予長浜駅, 一出站, 見到有燈位, 過對面馬路行一陣就係碼頭.

船就每日只得兩班, 而且係島民優先. 另外要留意, 事關要預留足夠座位比坐早班船嘅遊客回程用, 下晝船係可能會隨時無位剩. 所以朝早坐JR又開, 自己揸車去又好, 甚至住响碼頭附近都好, 點都係坐早班船比較穩陣.

船期同船費, 可參考以下官網:

https://www.city.ozu.ehime.jp/soshiki/nagahamash/0375.html

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次. 夏季同冬季亦可以分有兩組唔同嘅班次. 一個唔留神, 好容易就會睇錯隔離班次. 另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

1,924 total views, 8 views today

您可能也會喜歡…

發表迴響

你的電子郵件位址並不會被公開。

Bitnami