島上遇到貓 ~ 馬島 (umashima)

藍島D貓講拜拜之後, 我地再次登船, 10分鐘就到馬島. 除左郵差同我地, 全船嘅遊客都無人落船! 可見連大部份日本人自已都以為只有藍島有貓. 諗番起好多年前去田代島, 隔離網地島都係無遊客會去, 但其實網地島都有貓, 只係田代島太過出名.

馬島比藍島細一半, 只得一個小小港口同一條小村落, 一陣就可以行完. 島上面零遊客, 零廣東話. 或者要多謝傳媒過份報導藍島, 我地幾乎可以同馬島每隻貓慢慢影學生相. 馬島無食堂, 打算留得耐嘅話, 就要响小倉買定乾糧. 汽水機就唔使擔心. 島上面亦無民宿.

落船之前問過郵差係唔係每日都黎, 佢答係. 為左照顧島民嘅需要, 郵政嘅成本都唔輕.

一落船就有貓接船

路過一間神秘屋, 不斷有貓出出入入, 但問唔到屋主實際有幾多隻, 我地保守估計超過40隻!

我地有我地影, 佢地有佢地瞓

放飯時間到

貓花

貓花

放飯之後無耐, 碼頭有人又餵魚比佢地食

藍島嘅車無車牌, 馬島嘅車就有車牌

响藍島遇到一隻藍眼貓, 馬島都遇到兩隻

曬蒜頭

响馬島遇唔到馬, 但遇到好多貓, 馬島係我去福岡咁多個貓島, 我最鐘意嘅一個.

馬島等船嘅待合室

送船嘅代表

交通資料

由博多出發, 首先要搭JR去小倉駅, 然後行十分鐘左右去碼頭. 博多<->小倉有好多火車選擇, 有慢車, 快車同最快嘅新幹線, 只需十六分鐘. 不過要留意呢一段嘅新幹線, 用JR九洲pass係坐唔到的! 至於用JR 西日本 pass就好多隻都得. 由小倉駅行到碼頭, 最好預15分鐘, 同事前睇一次google street map熟悉一下附近建築物. 網站話由小倉駅北口10分鐘行到, 佢係假設你識行同行得快. 而且小倉駅唔細, 未必一落車就係北口位置. 碼頭前又有一盞交通燈.

船期每日只有3班, 最多4班(夏季嘅周末同公假), 所以預鬆D時間好過送船尾. 自已揸車嘅話, 碼頭附近有停車場.

船會首先停馬島, 船程約20分鐘. 之後多左10分鐘就到藍島.

回程一樣, 會先停馬島, 然後再到小倉.

http://www.city.kitakyushu.lg.jp/san-kei/file_0043.html

上層

下層

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次. 夏季同冬季亦可以分有兩組唔同嘅班次. 一個唔留神, 好容易就會睇錯隔離班次. 另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

1,969 total views, 3 views today

您可能也會喜歡…

發表迴響

你的電子郵件位址並不會被公開。

Bitnami