島上遇到貓 ~ 網地島 (ajishima)

我估網地島可能唔係太多人聽過, 但位於宮城縣嘅田代島就多數聽過. 網地島就响田代島隔離, 面積比田代島大約一倍. 其實坐去田代島嘅船公司, 就叫網地島Line (網地島ライン). 船由石卷市出發, 會先停田代島, 然後到網地島, 最後會去鮎川. 田代島同網地島各有兩個碼頭, 田代島有大泊同仁斗田, 網地島有網地同長渡. 由田代島去網地島, 最近嘅兩個碼頭大約相距20分鐘船程. 因為時間所限, 我地只去了網地島嘅網地港, 無去到長渡港. 希望將來有機會吧.

由田代島著名嘅貓型渡假屋望過去網地島

馬島嗰篇都提過, 網地島有D似馬島, 唔係地形或風景似, 而係絕大部份嘅遊客, 包括日本人, 只會慕名去傳媒瘋傳嘅嗰一個島, 彷彿只有嗰個島有貓. 明明兩個島就响隔離, 而且隻船都會行經. 時間許多嘅話, 唔落船去睇下, 我就會覺得有D可惜.

我地落船之後, 响漁港見到兩位漁民正响度開海膽, 旁邊仲有位島民同佢地吹緊水. 我就問佢地可唔可以影張相. 佢地話可以. 又問我地响邊度黎, 我地就答香港. 兩位漁民唔知香港响邊, 旁邊位島民就知, 問我地咁遠黎做乜, 我就答黎影貓. 之後漁民問我地食唔食海膽, 我話食到, 佢地就請左我到食一隻. 呢隻係我第一次响日本食到新鮮即開嘅海膽! 產地直送入口, 回味無窮!

漁港再行前少少, 就係一個海灘.  再行就有小村落同民宿. 我地去嘅時間係夏天, 好多貓都哩埋無出黎. 網地港有巴士去長渡港. 網地港見到海浴場就有小食攤檔. 長渡港果邊無去到, 就唔清楚了.

網地白浜海水浴場

夏天去日本村落, 不時會見到村民曬青梅, 做梅干し

梅後面有隻貓

手推車下有隻貓

响網地島唔會聽到廣東話, 非常好. 我地當年去田代島時, 都聽唔到廣東話. 反而有日本人知道我地係香港人之後, 用普通話同我地傾計.

傳統傳媒好意炒大雜薈, 慕求一個點有幾百萬樣野食睇同玩, 忙過返工, 認為咁先係去旅行嘅正確態度. 當然其中不乏好介紹, 可惜嘅地方係佢地將好多佢地認為唔夠話題, 唔夠好玩, 定性為悶嘅地方然後過濾左.  但子非貓焉知貓之樂? 你甘心你下個旅程仲係比一少撮人嘅喜好所左右嗎?

科技進步, 發佈相片同文字嘅話事權已經响你手上. 島上除左遇到貓之外, 仲會遇到好多其他人事物. 你遇到嘅一定同我唔同. 除左網地島, 世界上仲有其他成千上萬嘅島, 等緊大家去尋寶. 我寫呢個系列嘅目的, 都係希望將來可以睇到更多大家嘅分享: 你响路上遇到嘅驚喜.

相繼續睇田代島嘅貓咪, 請按以下兩條連結:

島上遇到貓 ~ 田代島 [上]

島上遇到貓 ~ 田代島 [下]

交通資訊

由東京出發, 坐新幹線, 大約個半鐘就到仙台.

到左仙台, 就轉仙石線, 大約一個鐘就會到石卷.

到左石卷, 火車站外可以坐巴士或的士去碼頭.

坐巴士嘅話, 可以坐”石巻市内線”, 然後响” 網地島ライン前”落車.

http://www.miyakou.co.jp/bus/route/index.php

若然大家拎住行李嘅話, 坐的士都唔需要擔心跳到心臟病, 因為火車站去碼頭都唔係太遠.

揸車去嘅話, 附近有無料停車場.

船由石卷出發, 會先停田代島嘅大泊, 然後再停田代島嘅仁斗田.

之後離開田代島, 會先停網地島嘅網地, 然後再停網地島嘅長渡.

最後離開網地島去鮎川.

船期可以到船公司官網睇:

http://ajishimaline.com/index.html

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次. 夏季同冬季亦可以分有兩組唔同嘅班次. 一個唔留神, 好容易就會睇錯隔離班次. 另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

1,091 total views, 3 views today

您可能也會喜歡…

發表迴響

你的電子郵件位址並不會被公開。

Bitnami