島上遇到貓 ~ 地島 (jinoshima)

之前同大家介紹過九洲福岡聞名海外嘅相島, 就响相島東北位置, 可能只有當地人先知嘅兩個島, 大島同地島.  呢篇就講地島先, 下一篇再講大島. 如果你好似我咁, 去日本唔想聽到廣東話嘅話, 大島同地島絕對係零廣東話. 地島同相島差唔多大, 而大島就真係大好多, 比地島大三到四倍左右. 去大島同地島嘅碼頭响神湊港. 做資料搜集時, 見到大島有遊玩設施, 地島只有漁港民居, 我地先去較細同人少嘅地島.

地島有兩個碼頭, 船會先停泊港, 然後再到白浜港. 响泊港落船後, 附近行了幾圈, 都見唔到太多貓.

每個碼頭都會見到嘅待合室, 呢間畫左個貓頭

寧靜嘅泊港

用黎捉八爪魚嘅

睇路牌見路可以通去白浜港, 於是就決定唔等下一班船, 直接行過去白浜. 行到半路見到有位伯伯, 知道我地黎影貓, 就同我地講, 本黎碼頭下面應該有三十隻, 佢估可能俾野豬食左. 我就覺得可能性唔係太大吧. 由泊港行去白浜港其實係要經過一座山, 伯伯同我地講行到最高位會比較斜, 有點難行, 話可以車我地過去. 我仲希望沿路見到貓或影下風景, 就婉拒左伯伯一番好意, 同佢講話無問題, 我地應該行得到. 雖然後尾都有D後悔無坐到伯伯車. 山路兩邊都有大樹, 可以遮蔭, 我地慢慢行, 差唔多半個鐘就到白浜港. 白浜港相對泊港多住屋. 可惜去到時天氣好悶熱, 貓亦唔係見到太多. 地島有幾個展望台, 不過天有煙霞, 望唔到太遠, 都無花氣力行去. 留到有船返神湊港就走. 泊港無食肆, 白浜港有一間, 但要事前預約.

日本嘅坑渠蓋上面嘅圖案都好靚, 曾經有諗過影一輯相. 呢個上面寫住要珍惜海洋同草木, 非常有意思. 國民教育係可以咁做的

野豬出沒注意. 不過野豬就見唔到, 蛇就遇到一條

地島小學响高山上, 亦都係地震海嘯時嘅避難所

由地島望過去大島

白浜港

交通資訊

由博多駅出發, 首先要搭JR(鹿児島本線)到東鄉駅,  然後再轉巴士(約20分鐘)去”神湊波止場”.

https://jik.nishitetsu.jp/

神湊港碼頭

去地島的船每日有6班, 船程約15分鐘到 泊港, 然後再多10分鐘到白浜港.

http://www.city.munakata.lg.jp/tosen/jinosima.php

去大島的船每日有7班, 大船(可載車)船程約25分鐘, 細船(只載人)船程約15分鐘.

http://www.city.munakata.lg.jp/tosen/oosima.php

要留意:

如果大家有印象, 去相島都係搭呢條鹿児島本線, 無錯, 福工大前駅之後再過幾個站, 就係東鄉駅. 而呢條線係有分快車同(即係站站停), 趕時間嘅話就要睇清楚時間表.

船倉內

响在碼頭入面認識到呢個只俾男人上去, 唔俾女人上去嘅世界遺產 ~ 沖ノ島

神湊港碼頭個站叫神湊波止場

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次. 夏季同冬季亦可以分有兩組唔同嘅班次. 一個唔留神, 好容易就會睇錯隔離班次. 另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

1,392 total views, 3 views today

您可能也會喜歡…

發表迴響

你的電子郵件位址並不會被公開。

Bitnami