島上遇到貓 ~ Büyükada

土耳其伊斯坦堡附近有9個島嶼, 叫Prince Islands,  其中4個有公眾航班去: Büyükada, Heybeliada, Kınalıada同埋Burgazada. 而當中最大既Büyükada 似乎係最多船去. 因時間唔夠, 同第一次去土耳其, 為安全計, 我地就選擇去呢個島. 當然, 最多船去即係代表最多人去.

飛機降落伊斯蘭教時, 剛好飛越Büyükada(圖左)

去Büyükada嘅碼頭有好多選擇, 我地响歐洲區既Eminönü 上船. Eminönü 有D似我地既中環碼頭, 有船去好多唔同嘅目的地. 由Eminönü坐船去Büyükada 就好似我地由中環坐船去長洲咁. 船有分快同慢, 慢船約一小時. 去到Büyükada , 一上岸就會見到好多海鮮餐廳, 然後行入內街就有好多唔同嘅小商品, 真係好似去左長洲咁! 土耳其好多貓, Büyükada 都唔例外, 一落船就見到貓. 長洲都有唔少貓, 分別在於Büyükada 既貓講土耳其話, 長洲既貓講廣東話, 但都同樣可愛. 題外話, 伊斯坦堡唔少景點都聽到廣東話, 但响Büyükada就絕對係零廣東話, 非常好.

由船上遠望Blue Mosque

由船上遠眺連接歐亞嘅Bosphorus Bridge. 左邊係歐洲, 右邊係亞洲

途經Maiden’s Tower, 可惜最後都係無時間上去

抵達Büyükada

好靚嘅碼頭

伊斯坦堡超多海鷗, 坐近海邊可以餵佢地食麵包

Büyükada同長洲一樣都係無汽車(除左救護車之類). 長洲有單車出租, Büyükada都有, 但單車之外, 就多一樣選擇, 馬車. 島上有酒店, day trip或過夜都適宜. Büyükada有好多Ottaman-Victoria式嘅舊屋, 喜歡建築嘅朋友可以多一樣野欣賞.

行過一條商品街時, 見到好多人眾响一間舖頭前面, 同一隻戴著黑超嘅貓影相. 當人群散咁D嘅時候, 老闆可能見我地係亞洲人, 又見我拎住大機, 就响褲袋拎左個一蚊出黎, 然後示意我跟佢行. 我開頭都唔知乜事, 就跟住佢行. 原來係行過幾間舖, 用一蚊買左塊香腸. 之後返番佢舖頭, 又示意我準備相機. 老闆應該有6呎高, 佢伸直隻手, 貓貓就一野跳起食左塊香腸. 本黎想問多幾句, 但有電話搵老闆, 佢入左舖. 返到香港之後, google見到原本有唔少人都同黑超貓影過相!

伊斯坦堡除左貓多, 狗都唔少, 不過我都係主力影貓

右下面隻黑貓係瞓緊, 唔係死左. 相入面絕大部份都係遊客, 點解隻貓可以大剌剌咁瞓响馬路中間? 我深信, 人貓共存, 事在人為

Büyükada實在太大, 我地6月中時去, 天氣開始熱, 我地亦無租單車, 只係响碼頭附近食個lunch, 然後就四圍搵貓影相. 不過實情响土耳其係唔需要搵貓, 有時D貓係多到你唔知影邊隻先好!

有機會再去伊斯坦堡, 一定要再去埋其他三個島.

最後, 俾大家睇下黑超貓個真樣!

交通資訊

去Prince Islands有唔嘅船公司, 有快船有慢船, 停嘅島亦有唔同. 而歐亞兩邊都有好多個碼頭可以上船, 所以其實有好多選擇, 主要睇你嘅行程就近邊個碼頭. 以下係我坐嘅船公司, 大家可以參考一下:

http://en.sehirhatlari.istanbul/en/timetable/eminonu-kadikoy-adalar-3485.html

我地係坐呢隻三層嘅慢船

去程時就坐有冷氣嘅中層. 回程時就坐最高露天嘅位影海鷗

其他船公司嘅細船

回程時好多海鷗跟住隻船

船上面唔少人拋D麵包餵海9, 佢地同黑超貓食香腸一樣, 快狠準

 

2,449 total views, 1 views today

發佈留言

發佈留言必須填寫的電子郵件地址不會公開。

Bitnami