島上遇到貓 ~ 興居島 (gogoshima)

由高浜港碼頭望過去對面就係興居島, 好似維港咁近

根據wiki所講, 位於日本四國愛媛縣松山市近嘅忽那諸島, 總共有7個島, 分別為中島, 津和地島, 怒和島, 二神島睦月島, 野忽那島同由利島. 當中由利島係無人住. 雖然行程中有幾日落大雨, 但都叫走馬看貓, 先後登上全部有人住既6個島. 不過今次唔係講忽那諸島, 而係講正正對住高浜港碼頭嘅興居島.

興居島上面有兩個碼頭, 分別為泊同由良, 坐Ferry(可載車)去, 兩度都係十幾分鐘就到. 泊同由良相隔都幾遠, 要坐車或踩單車. 因時間關係, 我揀左去由良.

對正高浜既係泊港

準備停靠由良港

响由良搵貓之際, 有位小學生(姓Sakamoto)岩岩落校巴返屋企, 見到我時, 好有禮貌同我打招呼. 我問佢附近有冇貓, 佢答我話有, 於是我就問佢D貓响邊, 佢諗左一陣,話帶我去搵, 不過會有可能唔出現. 我話我明白, 無問題, 唔該晒. 一齊行去搵貓既時候, 佢知我唔係日本人, 就問我响邊度黎, 我答香港, 但佢唔識香港呢處地方. 我話俾佢聽香港响好遠, 我坐左3個鐘飛機黎.

以往經驗, 同外國人講我係由香港黎, 絕大部份都知道香港, 忽然有人話未聽過, 係會有D手足無措既感覺 . 小朋友帶我去到, 我就話我自己再搵, 走嘅時候, 佢同我hi five! 我兜左一陣之後, 真係見到幾隻肥貓 . 希望有機會去埋泊果邊, 睇下會唔會有其他貓.

就係呢幾隻肥貓啦

之後响另外一處見到呢隻好可愛嘅黑貓, 一聽到shutter聲, 明明按緊摩食緊野都衝過黎

興居島風景

興居島就少D櫻花見到了

呢邊D島大部份都有好多蜜柑田, 呢家人花園入面都有

野生紫藤

由興居島望返過去高浜港

 

交通資訊

去興居島嘅船高浜港出發, 只有載車嘅Ferry. 因我住松山, 我就搭伊予鉄道高浜線, 坐到去總站高浜駅. 一出高浜駅行過對面馬路, 就係碼頭.

高浜駅

高浜駅過條斑馬線, 就係高浜碼頭. 右邊屋仔就係賣飛既地方同等待室. (去興居島就上左船先買飛) 屋企外只寫中島同ごごしま. 忽那諸島果幾個島無寫晒出黎, 只寫中島. 而興居島就唔用漢字, 只用假名ごごしま. 我見其他好多告示牌都係用ごごしま, 唔知點解.

講開又講, 個島字, 幾時用しま幾時變じま, 又好似幾隨機. 睦月既發音, 我都聽到有兩種唔同既高低. 由細學起, 同大個左先學一隻外語, 真係有好大分別. 大個先學, 會以為乜都有format跟, 乜都有得解釋. 但細細學就唔會質疑咁多, 大人講乜就跟住講. 所以, 真係想要學識運用一隻外語, 一定要响當地生活一排, 先會叫做掌握到一D exceptional case嘅野.

高浜駅對面過一條馬路就係碼頭

去興居島嘅船期同收費, 可參考官網, 基本上每個鐘都有一班:

http://home.e-catv.ne.jp/kofuji-kisen/

但上船前記緊睇清楚隻船係去泊定去由良,  事關兩隻船都係一樣樣. 船兩邊嘅中間位置, 就有寫住去嘅目的地

蜜柑mascot

由船上望返去高浜碼頭

高浜港行過少少, 十分鐘左右(火車站有接駁巴士), 就係松山觀光港, 可以坐船去廣島

最後,  行去松山觀光港嘅途中, 遇到幾隻貓, 影到其中一隻靚靚三色

 

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次. 夏季同冬季亦可以分有兩組唔同嘅班次. 一個唔留神, 好容易就會睇錯隔離班次. 另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

1,132 total views, 3 views today

您可能也會喜歡…

發表迴響

你的電子郵件位址並不會被公開。

Bitnami