島上遇到貓 ~ 座間味島 (zamamijima)

座間味島係我去嘅第一個日本貓島. 由沖繩霸坐快船嘅話, 都要差唔多一個鐘先到. 出名黑仔嘅我, 又遇到颱風, 第一日大浪到停航, 到第二日都delay好耐先上到船. 附近其他幾個島阿嘉島, 慶留間島, 外地島, 渡嘉敷島等等都無時間去. 希望有機會再去沖繩時, 可以上呢幾個未去嘅島搵貓.

座間味島約有3個長洲咁大. 一般日本人去座間味都係為潛水或浮潛, 同船有見到一大班小學生, 應該係去field trip, 手上拎住一疊熱帶魚同珊瑚資料在互相研究. 島上面有民宿, 食肆同小商店. 過夜或daytrip皆宜.  因天氣嘅關係, 都無再去諗租車或單車環島遊, 只係响碼頭附近村落行行.

沿途見到好多岩石小島, 呢個有D似獅子山

島上嘅坑渠蓋面圖案係一條鯨魚. 好想冬天時再去沖繩睇鯨魚

沖繩都有唔少用黎辟邪嘅石敢當. 石敢當係點樣由中國傳到去日本, google可以搵到好多學說. 我反而最想知道係古人點樣遠航探險. 帶唔夠野食, 或者可以捉魚. 但食水問題點樣解決? 靠露水夠嗎?

沖繩好多貓, 但點都唔夠石獅子多. 梗有一隻シーサー响左近. 用黎辟邪嘅Shisa都係由中國傳過黎

當年影相無耐, 有一個壞習慣, 就係影完一張就望下個mon影成點. 就係呢幾張之後, 睇下影唔影佢錫Shisa. 點知就係响我睇mon時老婆話佢打喊怒! 雖然我都好鐘意佢錫Shisa果張, 但係佢同Shisa一齊打開口嘅畫面, 應該會更加有趣. 自此之後, 我就介左呢個壞習慣, 影完相一定唔會望mon, 而係望住隻貓, 以備佢會再做D乜野特別動作.

除左呢兩隻黑貓同白貓, 响沖繩都影到一張貓+Shisa嘅合照

交通資料

去座間味島嘅船, 由那覇泊港出發. 當年我地住近碼頭附近, 可以步行去過去.

船有分Ferry和高速船. 要留意上船位置係有所不同.

上船的位置: http://www.vill.zamami.okinawa.jp/info/pricelist.html

坐Ferry嘅話, 會先停阿嘉島. 回程同樣, 都會停一停阿嘉島. 高速船就睇班次, 有幾班會係直航座間味島, 唔停阿嘉島.

船期: http://www.vill.zamami.okinawa.jp/ship/

那覇泊港

中途停阿嘉島, 當日都有好多人落船

阿嘉大橋, 打風日子, 只能幻想藍天白雲同海底下面嘅珊瑚

Ferry船身有兩條鯨魚

Ferry船身有兩條鯨魚

 

 

1,314 total views, 5 views today

您可能也會喜歡…

發表迴響

你的電子郵件位址並不會被公開。

Bitnami