島上遇不到貓 ~ 野忽那島 (nobutsunajima)

路上遇到日暈

根據wiki所講, 位於日本四國愛媛縣松山市近嘅忽那諸島, 總共有7個島, 分別為中島, 津和地島, 怒和島, 二神島, 睦月島, 野忽那島同由利島. 當中由利島係無人住. 雖然行程中有幾日落大雨, 但都叫走馬看貓, 先後登上全部有人住既6個島.

响睦月島興奮過後, 滿懷希望準備去野忽那島. 點知响睦月島買船飛去野忽那島時, 售票員竟然問我想坐幾點船離開野忽那島, 要我買埋回程. 我都覺得奇怪, 事關閒日去, 照計應該唔好人多到咁. 而且去另外幾個島時都無遇到過咁嘅情況.

去到野忽那島, 落船去到碼頭待合所一睇, 原來係野忽那島日漸少人, 所以唔知由幾時開始, 已再無售票員留守. 入村之前, 就會見到野忽那小學, 當然E家已無人再响樹返學.

影左貓咁耐, 雖然唔係100%準確, 但附近有冇貓唔多唔少都感覺到. 我平時好少主動問人邊度有貓, 但行左兩個圈, 唔係好對路, 終於都係要問人. 問左幾位村民都話呢個島無貓, 叫我不如去隔離睦月島, 因為都有人叫睦月島係貓島. 之後再問到兩位村民, 分別同我講, 4~5年前, 野忽那島係有幾十隻貓. (呢樣我睇相睇過, 村入面亦見到有貓出現過既跡象). 但傳聞比人毒死晒. E家只剩番一隻.佢地都有話比我知果隻貓响邊度出沒, 但我等左好耐都遇唔到. 呢個同我上年去宗象地島有D類似, 又忽然有一年幾十隻貓死晒. 傳染病係我諗到既其中一個原因. 另一個, 我諗到既可能係, 餵開貓既公公婆婆離開人世後, 貓咪相繼離去. 人口老化既問題, 其實响日本好多呢D小島都發生緊.

傳統傳媒, 有種種既原因, 理由, 限制, 佢地會主動或被動地filter左好多資訊. 佢地有報導過既, 大家就會覺得事態好嚴重, 大量資源會蜂擁而至, 佢地冇報導過既, 彷彿世界上從未出現過呢個小島. 真係希望再過個幾年, 藉social media可以打破呢種無奈. 最後, 要多謝郵局職員, 肯借廁所比我, 如果唔係我就要好似D貓咁响沙灘解決!

野忽那島風景

小學外圍有好多棵滿開既櫻花

我唔係櫻花控, 只係做個記錄

過左小學, 就係漁港, 感覺已無乜人氣. 之前見人响度影過貓

忽那諸島既防波堤, 同上年去九州果邊見到有D唔同, 就係開口既地方, 幾乎全部都會有閘. 唔知幾時會閂? 同邊個去閂?

好香既薰衣草

再次遇到野生紫藤

島上面有更高既地方(一來掛住搵貓, 二來有D曬, 所以無上到), 揀個海拔唔高, 再加上近海邊既地方, 有D唔明.

有人屋企既花園入面竟然有個郵筒

左邊係睦月島, 對出有個島仔, 相既右邊無入鏡既係野忽那島. 島仔上面有枝塔, 大相可能先睇到, 塔上面有電覽分別連接去兩邊既島. 附近其他島唔覺有 (不過可以前一日落雨無留意) D船高D既話, 應該過唔到呢兩個島之間既海峽吧? 夜間又點通知呢? 定航海圖有標示?

呢個係船過左個海峽, 準備轉入野忽那港. 望番去野忽那島, 右邊有枝塔就係有電覽連住島仔上面枝塔

 

交通資訊

去忽那諸島, 我全部都係由高浜港出發, 坐高速船或可載車嘅Ferry. 因我住松山, 我就搭伊予鉄道高浜線, 坐到去總站高浜駅. 一出高浜駅行過對面馬路, 就係碼頭.

高浜駅

高浜駅對面過一條馬路就係碼頭

去野忽那島就要坐中島汽船嘅東線. 船有分高速船同可載車既Ferry. 快船同慢船唔係差太遠, 但價錢就差好多. 大家可以去中島汽船嘅睇官網資料, 然後自己衡量一下:

船期表:

http://www.nakajimakisen.co.jp/contents/time-table.html

船費表:

http://www.nakajimakisen.co.jp/contents/price.html

因為要就行程, 我就揀左坐Ferry

船入面既裝潢感覺幾豪華

上到船入面, 可以拎到既証明書, 應該係比上班族claim錢用

溫馨提示

日本火車、巴士同船嘅班次, 有時可以細分到<星期一至五>、 <六>, <日及公眾假期>三組唔同嘅班次. 夏季同冬季亦可以分有兩組唔同嘅班次. 一個唔留神, 好容易就會睇錯隔離班次. 另外, 文中提及既價錢亦隨年日可能有所改變, 所以最好响出發前再上文章內提供嘅link再確認一次.

856 total views, 1 views today

您可能也會喜歡…

發佈留言

發佈留言必須填寫的電子郵件地址不會公開。

Bitnami